Политика за приватност

Оваа политика важи за сајтот на еФакт и за десктоп апликацијата еФакт. Ја објавува РиД ДОО (во понатамошниот текст „ние“), како контролор според Законот за заштита на личните податоци („Службен весник на РСМ“ бр. 42/2020, со измените). Нашите податоци за контакт се на дното на страницата.

Накратко

• Без додатоците, вашите документи не минуваат преку нас. Нема сметка кај нас. Фактурите апликацијата ги праќа директно до системот е-Фактура на Управата за јавни приходи (УЈП).
• Додатоците се по ваш избор. Ако вклучите додаток (онлајн резервна копија, фактура од документ со AI, праќање по е-пошта или потсетници), до нас стигнува само она што тој додаток го бара. Види Додатоци.
• До нас стигнуваат само проверката на лиценцата и бројки за користење. Ознака на инсталацијата, верзија, оперативен систем, IP-адреса, клуч за лиценца и дневни бројки (колку пати е отворена страна или користено дејство). Бројките може да ги исклучите во Поставки.
• Фактурите, сертификатот и PIN-от остануваат кај вас. Немаме пристап до нив.
• Сајтот користи Google Analytics само ако се согласите. Види Колачиња.
• Податоци од вас добиваме само кога ќе ни пишете.

Апликацијата

еФакт е програма што работи на вашиот компјутер. Таа ги обработува податоците што ги внесувате (купувачи, ставки, износи) и ги праќа директно до УЈП, преку efaktura.ujp.gov.mk (или тест-околината efakturatest.ujp.gov.mk).

• Локална база. Пратените и примените документи, статусите, PDF-ите и нацртите се чуваат во база на вашиот компјутер. Ги бришете со бришење на базата или на апликацијата.
• Сертификат и PIN. Сертификатот останува во датотеката, на токенот или во системскиот Keychain. PIN-от и лозинката стојат само во меморијата додека апликацијата е отклучена и не се запишуваат.
• Ние не сме обработувач, освен за додатоците. Без додатоците податоците не минуваат преку нас, па не ги гледаме и не ги обработуваме во ваше име. За личните податоци во вашите фактури (на пример, име на трговец-поединец) контролор е вашата фирма. За податоците што ги праќате до УЈП, УЈП е посебен контролор, според своите прописи.

Додатоци

Додатоците се плаќаат посебно и се вклучуваат само ако ги нарачате. Само тогаш апликацијата праќа до нас податоци од вашите документи. За тие податоци ние сме обработувач во име на вашата фирма, а вашата фирма останува контролор. Основ: извршување на договорот. Сертификатот, PIN-от и лозинката никогаш не се праќаат.

• Онлајн резервна копија. Апликацијата редовно праќа копија од локалната база (документи, купувачи, PDF-и, нацрти) на наш сервер во ЕУ. Чуваме 2 копии на географски одделени локации. Копиите ги чуваме додека е вклучен додатокот и ги бришеме најдоцна 30 дена откако ќе престане.
• Фактура од документ со AI. Документот што го прикачувате (Word, PDF, слика, скен) се праќа на наш сервер, а оттаму до давател на AI модел што го чита и враќа нацрт-фактура. Давателот го обработува документот во наше име и не го користи за тренирање модели. Документот не го чуваме откако нацртот ќе се врати; чуваме само колку кредити сте потрошиле.
• Праќање фактури по е-пошта и потсетници за неплатени фактури. Пораката, со адресата на купувачот, текстот и PDF-от во прилог, оди преку наш сервер и давател на е-пошта до купувачот. Содржината не ја чуваме откако пораката ќе се испрати. За наплата чуваме запис за секоја порака (време, адреса на примачот, статус) најмногу 24 месеци.

Давателите што ги користиме за додатоците ги обработуваат податоците само во наше име, според писмен договор.

Лиценца и статистика за користење

Апликацијата се јавува на нашиот сервер за лиценци при стартување и потоа приближно еднаш дневно.

• Проверка на лиценцата. Се праќаат: случајна ознака на инсталацијата (создадена при првото стартување), верзијата на апликацијата, оперативниот систем и клучот за лиценца ако сте го внеле. Серверот ги бележи и IP-адресата и времето на проверката. Служат за пробниот период, за проверка дали лиценцата важи и за заштита од злоупотреба на клучот. Основ: извршување на договорот за лиценца, а за пробата наш легитимен интерес.
• Статистика за користење. Заедно со проверката апликацијата праќа дневни бројки: колку пати е отворена секоја страна, колку пати е користено секое дејство (на пример „Прати“ или „Зачувај нацрт“) и колку пати се јавил секој вид грешка. Бројките се врзани за ознаката на инсталацијата, а преку неа и за лиценцата. Никогаш не се праќаат износи, имиња, ЕДБ, содржина на документи, сертификати ниту PIN. Служат за да видиме што се користи и каде има проблеми. Основ: наш легитимен интерес. Статистиката е вклучена по стандард; при првото стартување апликацијата ве известува и може да ја исклучите веднаш или подоцна во Поставки. Кога е исклучена, ништо не се брои, а неиспратените бројки се бришат.
• Рок. Проверките на лиценцата (IP-адреса, време, ознака на инсталацијата) и дневните бројки ги чуваме најмногу 24 месеци, потоа серверот сам ги брише. Ако пробата 24 месеци нема проверка, остануваат само ознаката на инсталацијата и датумот на почеток, за да не може пробата да се почне одново.
• Каде се чуваат. Серверот за лиценци го водиме ние, на сервер во Германија (ЕУ). Давателот на хостинг ги обработува податоците во наше име; податоците не се пренесуваат надвор од ЕУ.

Сајтот

Сајтот е статичен: нема формулари, најава ни коментари. Фонтовите и сликите се на нашиот домен, не кај трети страни.

Google Analytics. Ако притиснете „Прифати“ во известувањето за колачиња, користиме Google Analytics 4 за да броиме посети и да видиме кои страни се читаат и од каде доаѓаат посетителите.

• Податоци: случаен идентификатор на прелистувачот (колачето _ga), посетени страни, време, препорачувач (од каде сте дошле), тип на уред и прелистувач, јазик и приближна локација (држава, град) изведена од IP-адресата. Google Analytics 4 не ја чува IP-адресата.
• Цел: да видиме што се чита и што треба да се подобри. Не правиме профили за поединци и не ги користиме податоците за реклами.
• Основ: ваша согласност. Можете да ја повлечете во секое време преку „Поставки за колачиња“ на дното на страната.
• Обработувач: Google Ireland Limited, според договорот за обработка на податоци на Google. Податоците може да се пренесат во САД, врз основа на рамката EU–US Data Privacy Framework и стандардните договорни клаузули.
• Рок: 14 месеци, потоа Google автоматски ги брише.

Давателот на хостинг, како и секој веб-сервер, може автоматски да бележи технички податоци за секое барање: IP-адреса, време, побарана страница и тип на прелистувач. Тие служат за работа и заштита на сајтот (на пример, од напади), не за профилирање, и се чуваат кратко.

Кога ќе ни пишете

Кога ќе ни пишете (на пример, за рана верзија, за поддршка или за SDK), ги обработуваме вашата е-пошта, името, фирмата и содржината на пораката.

• Цел: да ви одговориме, да ви ја испратиме апликацијата и да ви помогнеме.
• Основ: преземање мерки на ваше барање пред склучување договор, односно извршување договор, и наш легитимен интерес да одговориме на пораки.
• Рок: додека трае комуникацијата и најмногу две години по последниот контакт, освен ако закон бара подолго (на пример, за сметководствени документи).

Ако за поддршка ни пратите слика од екранот, документ или лог, ги користиме само за тоа барање и ги бришеме кога ќе се реши. Пред да ги пратите, отстранете ги податоците што не ни се потребни.

Податоците не ги продаваме и не ги даваме на трети лица за маркетинг. Пораките ги примаме преку давател на е-пошта, кој ги обработува во наше име.

Вашите права

Имате право да побарате пристап до вашите податоци, исправка, бришење, ограничување на обработката и пренос, како и право на приговор. Пишете ни на адресата подолу; ќе одговориме најдоцна за еден месец.

Ако сметате дека податоците ги обработуваме спротивно на законот, можете да поднесете барање до Агенцијата за заштита на личните податоци (azlp.mk).

Деца

еФакт е наменет за фирми и сметководители. Не собираме свесно податоци од лица помлади од 18 години.

Измени

Ако нешто смениме, ќе го ажурираме датумот горе. Ако почнеме да собираме нови податоци, прво ќе ја смениме оваа страна, а каде што треба, ќе побараме ваша согласност.